Merry Christmas

So ich chume doch no dezue z'schribe devor ich nach LA gange :) Also zerscht mal: ich wünsche oi allne wunderwunderschöni Wiehnachte und denn scho bald en guete Rutsch is neue Jahr. Min Silvester wird in LA gfiired, denn chammer ja nume guet rutsche ;-)
Bi ois fiired mer Wiehnachte ja nid am 24., sondern am 25. Dezember und das heisst früeh uf stah am morge...nämlich am 6i!!Denn hemmer ois ready gmacht und de Vicki ihrere 5-jährige Enkelin gfahre. Sie hett ebä wellä dass mir so früeh wie möglich dete sind, damit sie schnellschnell ihri Gschenkli chan uspacke :D Und sie hett au ganz schön vill becho: Meerjungfrau-Barbie, Games, en Plüschtierhund wo bälle und laufe chan und denn chamer mitem go spaziere (was mer natürli no us probiert hend) und no ganz vill meh!
Ufem Tisch isch denn au no en Brief an Santa gsi mit agässene Guetzli und em halb leere Glas Milch.So typisch amerikanisch und natürlich d'Söcke obe am Ofe sind gfüllt gsi mit Candies. Ich han au paar Sache übercho, sie sind alli soo lieb! Sind würklich schöni Wiehnachte gsi!!

Am 24. bin ich denn au endlich s'erste Mal go Snöbe und es sich meeega cool gsi! Ich han s'Snowboard und alli Chleider vonere Kollegin usglehnt gha und denn sind en Kolleg und ich am 6:15 a.m. mitem Car zum Badgerpass in Yosemite gfahre det hemmer denn no en andere Kolleg troffe und zwüschet drin hemmer au no anderi Lüüt vode Schuel gseh. Es isch es ziemlich chlises Skigebiet aber es isch trotzdem voll luschtig gsi! Wer hetti denkt, dass mer in California chan go Snowboarde?! :D

Und au suscht sind mini Ferie bis jetzt mega cool gsi, han vill mit Kollege gmacht und bin chli go riite und no mit de ganze Family gkyped! Und ich glaub es liit no e zweiti super Wuche vor mir, wells am Mäntig nämlich ab nach Los Angeles gaht!!

Han oi alli mega gern,
Kim

P.S. Danke a alli wo mer es Chärtli oder so gschickt hend, froi mich immer riesig wenni Post bechume :-)

I wanna live in a Gingerbread house... but not in ours:)

3. Advent, die dritti Chärze brennt... aber leider nid bi ois! Amerika kenned das mitem Advent leider nid und sie hend eich au kei Schoggi Adventskalender... Aber wommer am Samstig in Modesto go shoppe sind hani doch tatsächlich eine entdeckt!!Ich hans nie igendwo gseh aber plötzlich ime Lade bini vor eim gstande... und hanen natürlich grad müesse chaufe :D

Ja das isch eich alles woni am Samstig gmacht han: SHOPPING mit minere Gastschwöster undere Kollegin!
Es sind so viel Chleider und so im Moment "on sale" denn hemmer müesse zueschlah ;-) Nachem Shoppe simmer denn is kino go "Love and other Drugs" go luege.. Isch zwar en guete Film aber ja, wür en ez nid umbedingt wiiterempfehle... Mir hend denn bide Tana übernachtet und na chli Film gluegt und so und hüt hemmer es Gingerbread House baue.. oder besser gseit: Mer hend oises Bestä gäh :D

Wunderschööön nid? Bitte nicht den Spalt zwischen Wand und Dach beachten... :D

Oh oh.....

Noooooo! Es isch zämäkracht...

Defür isch d'Reindeer Flight School guet use cho ;-)

Ja wahnsinnig vill meh z'verzelle gits eich nid... Iwe gseit mini Gastschwöster gaht hüt inere Wuche hei und ob mir e anderi Ustuschschüelerin bechume, isch immer nonig sicher. Aber ich hoffes schwär :)

Wünsch oi schööni Wiehnachte wemmer sich nüme ghört!

Christmas is coming...

Am Samstig bin ich mit minere Gastschwöster ad Crafts Fair vo oisere Town gange und det hetts mega vill schööni Sache hauptsächli für'd Wiehnachte gha. Und es isch alles handgmacht gsi! Nacher simmer chli i de Town gsi und alliiii Lädeli sind total beschmückt und i Wiehnachtsstimmig, gseht mega schöön us. Am 5i hett denn Christmas Parade agfange und es isch so herzig gsi wies das gmacht hend! Mit Ross und Autos und Samichläus und so wiiter. Au oisi Maching Band vode Schuel isch cho und ich han es Filmli gmacht und probiert no chli Town z'filme. Aber ich chans leider nid ufe lade... ich hans paarmal probiert aber es gaht igendwie nid. Aber ich versuechs denn später nomal!

Nach de Parade simmer im Subway go ässä. Das isch sone mega bekannti Sandwichbar us de USA. Obwohl ich glaube mir hend das ide Schwiiz au, mini Hostsis und ich sind beid no nie det drin gsi und mir hend kei Ahnig gha wie das funktioniert. Mer chan alles wähle wo mer im Sandwich wett, sogars Brot und welli Chääs-Art und so wiiter. Und de Maa wo döt gschaffed het, het so undütlich gred und mir sind überhaupt nid druus cho und denn hemmer mega müesse lache.. De Maa hett ois aglueged als wäremer vom Mond :D 
Nacher simmer as Basketball Game vode Schuel gange und sie hend guuuunne! Isch mega cool gsi! Ah ja für die wos nonig wüssed: Ich fang im Januar ziemlich sicher afa Fuessball spille... Kim und Fuessbal!! Wer hätte das gedacht? :D Ich chume sone Probewuche über und denn chani immer no säge dases mir nid gfallt. Aber es wird glaub scho ziemlich härt.. jedä Tag einehalb Stund Training! Aber ich han ez fascht 4 Mönet kei Sport gmacht (abgseh vom Riite) und drum nimi das in Chauf ;) Mer muess alles mal usprobiere suscht weiss mer ja nid obs eim gfallt oder nid, oder?!

Oh ja und hütt hani denn Spitzbuebe bache und de Christbaum gschmückt:

Isn't it pretty? ;)

Ja mir hend ez nur no 2 Wuche Schuel und denn sind scho Ferie! Ziit isch unglaublich schnell verbii gange igendwie... Und ja üfr die wos nonig wüssed, mini Gastschwöster vo Schwede gaht am 19. Dezember hei... Isch halt scho mega schad well mer hends eich scho mega guet zämä, aber ja es hett mehreri Gründ wieso sie hei gaht. Naja aber damit ich nid so allei bin und's mir nid langwilig wird, hett d'Vicki gfrägt ob sie nomal e anderi Ustuschschüelerin für es halbs Jahr chan uf neh. Und ez chunt warschindlich eini vo Österrich zu ois. Mir sind ez eich nur no uf ihri Unterlage am warte und denn wür sie vilicht sogar no vor de Wiehnachte cho. Es isch zwar nid so toll für mis English aber ja, ich froi mich wahnsinnnig!!!

Schribe denn wieder wenni öbis nois weiss.

Grüessli Kim

Thanksgiving

Ich sitze grad vor mim Computer ame regnerische Sunntignamittag und isse es leckers, selbergmachts Turkey-Sandwich...:D Mir hend Essensrescht für öbe 1-2 Wuche!! Am Dunnstig isch nämlich Thanksgiving gsi.

Mir hend i oises Huus gfiired und mer sind 9 Lüüt gsi. 2 Töchtere vode Vicki und dene ihri Familie und denn no en Kolleg vo ihne. Am Dunnstig Morge wo ich ufgstande bin hett mini Gastmami mich denn gfrägt ob ich wett zue luege wie mer s berüehmte "Stuffing" macht. Ich han natürlich denkt, wieso au nid.. aber denn bin ich denn scho grad chli gschockt gsi... Eigentlich isches hauptsächlich weichs Bort wo denn im Truthahn ine, kochet wird. Aber wases suscht na drin hätt..: s'Härz, d'Lunge und anderi Organ vom Turkey!! Und sie ehtt das eifacht so usem Turkey usegno und verschnätzlet und denn mite Brot gmixt.. Isch mer grad chli de Appetit vergange! Scho grad chli härt für öber wo vorher Vegi gsi isch. Aber ich han denn nid vo dem gässe..aber defür vom Restä und verhungeret bini also uf kein Fall. :D 

de heissbeliebti riiiese Turkey :)

S'ganze Esse suscht..

und natürlich de Dessert därf mer nid vergesse!

Es isch also würklich seeeehr guet gsi! Und isch au cool gsi mal mit de ganze Familie zämä z'sii.

Am Fritig sind mini Gastschwöster denn zunere Kollegin hei gange und mer hend ihres ganze Huus wiehnächtlich dekoriert! Es hett traumhaftschön us gseh und so typisch amerikanisch :D Überem Cheminée sind die Söcke ghanget, wo jedä sin eigene hett mitem Name druf und de Baum isch mit farbige Liechtli und Christbaumschmuck verziert gsi und so wiiter... Und wo ich denn verzellt ha, dass mir Cherzä hend anstatt vonere Liechterchettä, hends das eifach nid chöne glaube! Hehe jaja, jedä hett sini eigene Traditione.

Und denn hemmer oise Harry Potter Marathon gstartet: alli 6 Movies hemmer glueget! Am Fritig Namittag hemmer gstarted und die erste 4 glueget und denn gschlafe und denn nomal 2 glueget!! Hett also scho es Zitli brucht.. Und am Abig simmer denn go Mexikanisch esse (sooo delicious!) und as Basketball Game vode Schuel gange. Oisi bestä Spiller hend gege ehemaligi Mariposa Basketballer gspillt. Hett recht vill Action gha hehe und die Ehemallige hend denn schlussendlich mit 3 Pünkt meh gunne. Isch aber mega cool gsi.

Juhuuu d'Sunne sich underzwüschet au nachli füre cho!

Ich hoffe ihr hend alli en wunderschön erste Advent gha und es gaht nur no 4 Wuche bis Wiehnachte. Chans gar nid glaube!!

Ich vermiss oi!

What a surprise!

Wo ich hüt früeh am Morge verwached bin, lueg ich usem Fenster und was gsehn ich da?! Es hett s'erste Mal gschneit und es isch alles wiss gsi verusse! Denn han ich natürlich nüme chöne schlafe und bin grad usem Bett ghüpft, Schal, Chappe, en dicke Pulli und Stifel azoge und mini Kamera gschnappet :)

Ich chans chuum glaube, dass mir in California vor de Wülflinger Schnee gha hend ;)

Und wüsseder was s'coolste isch? Wenns hüt Nacht nomal Schnee git, hämmer morn en Snow Day, das heisst kie Schuel! Und will abem Dunnstig Thanksgiving Break isch, hettemer nume 2 Täg Schuel! Aber de Schnee schmilzt leider sooo schnell.. Trotzdem, hoffe chammer ja :)

Oh und wer hett scho de noii Harry Potter gluegt?! Mini Gaschtschwöster, e Kollegin und ich sind en am Samstig go luege und er isch eifacht genial! Und nachem Kino simmer denn ines Resti go ässä und det hetts sones riiiiesigs Salatbuffet gha. Denn hesch eifacht müesse $10 zahle und hesch chöne so viel wied wetsch uf din Teller biige udn hesch es Trinke (ungefähr en Liter haha) und es Glace no becho! Min Teller isch sooo überfüllt gsi und han gmeint ich verplatze :D  Ou und denn hememr au no deep fried Shrimp gha, yummie!!

Soo mer ghört sich nach Thanksgiving wieder! Hoffentlich sones richtig Amerikanisches.. aber de Turkey isch scho im Chüelschrank ;)

See you soon

Love, Kim



Yosemite National Park

5-Tage-Weekend!!
Tönt ja fascht wie Holidays! Aber ich hans au verdient, schliesslich han ich bis jetzt no kei Ferie gha! Uf jedäfall hämmer mit es bitzli "bschisse" 5 Täg frei gha, vom Dunnstig bis am Mäntig. Eigentlich hettemer am Fritig müesse id Schuel aber da Denise (die ander Ustuschschüelerin vode Schwiiz) zu ois cho isch, hemmer no en Tag meh frei gno ;-)
Am Dunnstig isches denn endliiiich sowiet gsi und d'Vicki, d'Zoe, d'Sandra, d'Denise und ich sind in Yosemite National Park gange, und es isch eifacht AMAZING gsi!! Luegts oi selber ah...

Manchmal sagen Bilder mehr als 1000 Worte...

wunderschööni Ussicht

Zoe and me

Vicki and me

Schnee juheee.. =)

Giant Sequoias

sie sind echt  gigantisch gross!!

voreme umkippte groooosse Baum

und es isch iiiischalt gsi

wow :)

Hoff die schöööne Bilder versüessed chli oi Wuche ;-)

Kim

peinlich, peinlich.. aber typisch KIM :-D

So zur Info am Afang: Dä Titel isch nid würklich vielversprächend, aber ja ich glaub es bringt oi chli zum schmunzle ;-)

Also zerscht mal, mer hend ja die Wuche die sogenannti SPIRIT-WEEK gha. Das heisst jedä Tag isch es anders Thema gsi, womer sich denn auntsprechend hett chöne verchleide. Aber ich han mich nid würklich vill verchleided (ihr wüssed ja, ich han nume 23 Kilo chöne da ane bringe und s'nächste Ichaufszentrum zum schnell schnell go shoppe isch einehalb Stund entfernt)

Monday: Nerd Day                (es hett nur so g'wimmlet vo Strebers ide Schuel xD )
Tuesday: Tacky Tourist          (hani mis I <3 NY Tischi agha)
Wednesday: Generation Day  (Freshmen:Babies,Sophmores: Chinde, Juniors:Adults,Seniors:Senior Citizens)
Thursday: Floatation Device   (alles Sache wo mit Schwümme z'tue hend, aber kei Bikinis haha)
Friday: Gold and Green Day  (das sind oisi Schuelfarbe)

Am Fritig isch denn au namal en Rally gsi aber das mal nid ganz so speziell wie de letschtmal.

Am Abig isch denn Homecoming gsi... =)

Well ich ja Homecoming Princess und somit im Homecoming Court gsi bin, bin ich mit de andere Prinze und Prinzessine ime separate Abteil vom Football Game ghocked. Mir hend zerscht mal die erste Helfti vom Game glueget, nid z'vergesse mitem Chleid, de High Heels und allem drum und dra.. Denn ide Pause hemmer en Bluemestruss und sone schööni Homecoming Court 2010 Schleife becho. Und jetzt chunt's peinliche.. Nachdem mir Ewigkeite gwarted hend und näbetbii no fascht verfrohre sind, simmer immer s'zweite als Päärli ufs Football Feld usegloffe. Und das ja scho öbe 9i am Abig gsi isch, isch d'Wiese natürlich chli nass gsi.. Und was passiert mir: ide Mitti ufem Football Feld vor praktisch de ganze Schuel, blib min High Heel im Bode fescht stecke und ich verlüür en!!! Wohl bemerkt ich ghör im Hindergrund so schöön im Echo: "Oh my Goooood! She lost her shoe" :D Denn hanich schön min Schueh wieder agleit und well ich's Gwicht ja uf de ander Fuess verlageret han isch de ander au na stecke blibe :D TYPISCH KIM!!! Aber wenigstens hend alli öbis z'lache gha , ich han e tolli Erinnerig und oi öbis z'verzellä.

Denn sind Queen und de King ernännt worde und es sind beidi gsi, für die wo ich g'stumme han ;-) Hend mega herzig usgseh!!

Echli spääter simmer denn alli zämä sones professionells Foti go mache, wo ich oi denn später na zeige, well ichs nonig han. Natürlich hemmer au suscht na paar Fötelis gmacht, aber sind nid würklich guet usecho... ich lad aber trotzdem mal paar ufe.

Mis Chleid und d'Schlaufe

Am warte und schier verfrüüre

wuueh nach dem ich min Schueh verlore han :D 

Prince and Princess

Sandra and me

    Yeo das wers eich scho gsii.. de Abig isch no zimelich luschtig verloffe. Mir hend eich wellä go tanze aber d'Musig isch nid grad so sagehaft guet gsii, drum simmer denn spääter wieder zrugg zum Football Game. Schliesslich isches s'letschte Home game gsi, aber leider leider hends verloore.. poor little Mariposa ;-)

Ich wünsch oi e wunderschööni Wuche und bis bald

Die euch vermissendi Kim ;-)

P.S. I nur no öbe 6 wuche gahts ab uf LA!! Chans kuum meh erwarte!! Aber zerscht chunt ja no Thanksgiving und Christmas. Es lauft also immer öbis =)

Ou ja und bervor ich's vergisse, min Toblerone Schoggi Mousse Versuech isch bim zweite mal endlich guet use cho, eifach herrlich.. han grad chli probiert :D

Rally & Happy Halloween

Buenos días :)

Soo.am Fritig isch ide Schuel de erste "Class Color Rally" gsi. Alli Freshmen händ white agha, Sophmores yellow, Juniors green und Seniors black. Und da ich ja Senior bin, bin ich ganz schwarz id Schuel gange. Oises Senior-Thema isch Zorro gsi und praktisch alli hend e Zorro Maske agha und schwarzi Streife im Gsicht. Denn sind alli id Turnhalle und es isch es riiiiise Gschrei gsi, jedä Jahrgang hett probiert so luut wie möglich z'sii und mir hend natürlich gunne ;-)

Da mir ja nächst Wuche Homecoming hend, isch i jedäm Jahrgang en Prince und a Princess gwählt worde usserd bi de Seniors sinds je 4 gsi. Und ob ihrs glaubed oder nid, aber ich bin als eini vo dene 4 Homecoming Princess gwählt worde :D Und denn am Rally hend alli Prinze und Prinzessine müesse füre gah und mer isch immer s'zweite es Päärli gsi und s'girl hett e Schoggi Turte mit viiiiel Schlagrahm hinderem Rugge ghebet. Und ide Turte hetts en Kaugummi versteckt gha. Und de Typ hett denn müesse Chopfvorah de Kaugummi usefische und möglichst schnell e Blattere mache. Und mir hend guuuuuunne!! Es isch soooo luschtig gsi und ich bin vo obe bis une mit Turte beschmiert gsi :D :D

Am nächste Fritig hemmer denn s'letschte Football Homegame und denn wird d' Homecoming Queen und de Homecoming King gwählt. Drum simmer gester go shoppeeee und ich han zwei mega schööni Chleider kauft (ich han mich nid chöne entscheide für weläs, dänn hani beid kauft :-) und hammer Schueh. D'Frag isch nur no ob ich mit dene chan laufe haha und Bilder chömet denn nachem Ball..

Ja und suscht bini am Fritig Abig no zude Kollegin, sie hett e Halloween Party gha und es isch echt cool gsi. mer hend später au na en huere krasse Film glueget.. isch echt scaryyyy gsi!!

S'ganze wucheend über isch au na a minere Gastmuetter ihri Nichte Zoe bi ois gsi und sie ishc 5i. Sie isch sooo süess aber chan au e richtigi Nervesägi sii.. Mer sind denn s'zweite mitem MyTe go riite und es isch so luschtig gsi :D

Am Samstig Abig bin ich denn zunere andere Kollegin go übernachte und mer hend a Scary Movies Night gmacht und es isch echt gruslig gsi..

Und hüt isch Halloween und d' Lüüt sind richtig crazy da. Alli Hüüser sind bedeckt mit Liechtli, Geister und Gspängst, Spinnenetz und natürlich überall hets Pumpkins.

Min Cookies Bachversuech:

Ich han denkt, mmmh wie wärs mit grosse leckere Cookies..

...und was gseh ich wo ich de Bachofe ufmache.. eis riiise Cookie :D

Sie hend denn zwar nid so guet usgseh, aber delicious sinds gsi. YUMMIE :-)

Alsooo ich wünsche oi Happy Halloween und bis bald!

Just Some Pictures

Hallihallöööchen :)

Ich han e Frag ah oi und zwar schribemer ide Schuel sone Arbet und ich hans Thema:
"Why is Switzerland one of the countries with the lowest crime rate in the world?"
Falls öbert e gueti Antwort hätt, wäri sehr froh drüber. :)

ja und suscht viell z'verzelle vode letschte Wuche gits eigentlich nid, aber bin immer schöön flissig am Fötele.

hett mega viell Eichörnli da :)

d'Schuel

the lower Campus

dä Grizzli wo oisi Schuel bewacht :P

das Foti hani nur anebracht, well mer mal pünktlich gsi sind. Mir händ nämli jeeeeedä Morge en Stress... ;-)

wases da nid alles für interessanti Tier git..

ja ihr gsehnd richtig... e TARANTLE!!! Ich han zellt, 11 hani bis ez gseh!!!

" We all have our time machines.

Some tkae us back,

they're called memories.

Some take us forward,

they're called dreams. "

Euii Kim

You deserve respect and will get it. (Panda Express Glückskecks)

"Der Mensch bereist die Welt auf der Suche nach dem was ihm fehlt.

Und kehrt zurück, um es zu finden."
 

WOW!! gester sinds genau 8 Wuche gsi, sitt ich da acho bin.

D'Ziit gaht echt schnell verbii aber irgendwie au ganz schön langsam. Und ich muess zuegeh, die letscht Wuche isch nid grad die Best gsi sit ich da bin.. Han chli Heiweh gha und han mich igendwie eifacht nid so wohl gfühlt gha. Aber jetzt isch wieder besser und denn hani denkt als Veränderig dueni au grad min Blog mal chli ändere xD

Am Mittwuch Abig hemmer Movie-Night gha ide Schuel vom French Club, und das isch echt cool gsi. Jedä hett chli öbis zum esse oder trinke mit bracht und ich han vorgha es Toblerone Schoggimousse z'mache. Aber die hend da igendwie en andere Rahm wo nid fescht worde isch.. denn sichs meh sone Schoggi Sauce gsi und mini Hostmom hett denn gfunde mir chönts ja probiere bache.. und use cho isch denn schlussendlich das:  

 Und de Sage hett d'Schüssle usgschleckt :D

Also de Gschmack isch nid schlecht gsi aber es Schoggi Mousse isches definitiv nid gsi ;-) Aber es hett so viel anderi leckeri Sache zum esse gha und so typisch amerikanisch (Cookies, Ice Cream, Pizza…)

(By the way, ich han hüt s’erste mal gwagt uf e Wag z‘stah und ich han nume 1 Kilo zuegno :D )

Anyway, de Film wommer gluegt hend hett gheisse À la Folie… Pas du tout oder in English He Loves me, He oves me not und er isch richtig genial gsi. Müender unbedingt luege bi Glägeheit, isch mit de Audrey Tautou (i love her!!)

Am Dunnstig bini mit minere Hostsis und drü Kolleginne is Yoga gange und es isch so cool gsi. Ich bin mer ez am überlege, ob ich regelmässig sött gah. J

Am Fritig hemmer denn wieder mal es Football Homegame und es isch voll cool gsi. Ich han zwar nur chli meh als eis Quarter gseh (de Rest hani ide Pizza Factory mit Kollege verbacht) und d’Grizzlies hend leider scho wieder verlore.. But it was fun!

Und gester bini denn mit 4 Kolleginne uf Fresno gfahre, das isch öbe einehalb Stund mitem Auto entfernt und denn simmer döt in Panda Express. Das isch American Chinese Food und eifach köstlich! De Rest vom Tag hemmer mit Shopping verbracht =)

Suscht sind au alli scho völlig im Halloween-Fieber (wie ihr uf de Bilder gsehnd :D ) und alli sind am plane als was sie sich sölled verchleide. Es git die Schuel sonen Halloween Dress-Up Day und da chunt echt jedä verchleided id Schuel :D Und denn bini au na zu zwei Halloween-Partys igladed und denn isch ja scho bald Homecoming. Wie ihr gsehnd, busy busy busy ;-)

Vermiss oi,

eui Kim

P.S. mir hend jetzt no zwei jungi Büsi becho aber hans nanig chöne fötele, sind uuu mega schüüch..

A woman can never have too much clothes...=)

Wie's de Titel scho seit.. mir sind gsi go shoppeeee in Modesto :)

Am Fritig nach de Schuel hett mini Hostmom d'Sandra und mich nach Modesto zu de andere Schwiizer Ustuschschüelerin gfahre. Denn simmer an Football Match vo ihrere Schuel (ENOCHS) gange und det hanis mal wieder so öbis typisch amerikanisches probiert: Nachos mit zu viiiiel Cheese... isch nid so bsundrigs guet gsi..

Am Abig hemmer denn Spirit der wilde Mustang glueget! Das isch min absolute Lieblingsfilm hihihi

Und am Samstig sind Denise, Sandra, Giorgia (vo Italy) und ich  denn go shoppe id Mall. Und mir hend sooooooo viiiiiiel kauft. Mer sind meh als 4h ide Mall gsi und sind im undere Stock nur i öbe 3 Läde gsii! It was just huge!!!

Sandra, Giorgia, me and Denise

...und dä Kofferruum isch volle :D

Am Abig simmer denn mit de Denise ihrere Hostfamily ines meeega riesigs Labyrinth ime Maisfeld und denn hemmer so 6 Pöste müesse finde. Isch voll luschtig gsi, mir sind öbe vom 11i bis am 1 ide Nacht det drin umegwanderet :D

Am Sunntig simmer denn wieder hei gfahre und und denn hani tausig Ufzgis müesse mache (vorallem Math.. horrible!!) Ah ja ich han überigens en geniale noie Tascherechner, wommer zum Biespil eifacht chan e gliichig itippe und denn zeigts de Graph haha d'Amis sind eifacht z'fuul :P Ja, wenni mal Ziit han machi mal e Lischte was alles anderscht isch da... sind glaub so viel Sache, dassi gar nid alli chan ufzellä :D

Have nice Week ;-)