Ich glaub min Titel verrated wo ich tatsächlich gsi bin... in HAWAII!!!!! wissi Sandstränd, klartürkisblaus Meer, traumhaftschöns Wätter und Sunneundergäng wie uf de Fotene. Eifacht en Traum!! Ich wär am liebste nochli länger döte blibe!
Also zerscht mal muessi verzelle wer alles gange isch: mini Gastschwöster vo Nueseeland Andy, denn die ander Schwiizerustuschschüelerin Denise, mini Gastmami Vicki, ihri (duredrüllti) Tochter Dawn und de Dawn ihri besti (no meh dureknallti) Fründin Sadie. Das chunt ja sicher schomal guet use, 6 Fraue alli i eine Wohnig in Hawaii :D
Aso uf jedäfall am Sunntig gäg de Abig simmer uf Maui nacheme 5 stündige Flug glanded und de isch (usnahmswies) nid mal so schlimm gsi. Well ich nämlich en Fensterplatz gha han und denn han ich doch mal chli usem Fänster güxled wommer scho zimmli tüüf une gsi sind und was gsehn ich det?! Wal wo im Meer am umeplantsche sind!! De ersti Idruck vo Hawaii isch also schomal unglaublich super gsi!
Nachdem mer endlich alli oisi Sache id Wohnig bracht hend isches scho dunkel worde und d'Andy, d'Denise und ich hend gfunde mer gönd doch für en Nachtschwumm! Mer hend chli Panik gha dass en Hai chunt aber mir sind so übertrülled gsi das mer de nacheme Ziitli vergesse hend dases da ja würklich Haiie git ;)
Am Mäntig simmer am Morge denn a sones Orientations-Meeting gange wommer über alles wommer uf Maui chan mache Infos becho hend. Mir hend Ewigkeite brucht zum ois einige, well es git soooo viel Sache zum undernäh! De Rest vom Tag simmer denn alli zämä mitem Auto wommer gmieted gha hend. ade Westküste vo Maui umekurvet. Und sind nochli go poste und so, vorallem Frücht! Ananas, Mangos, Papayas, Avocados und na ganz vill meh. Und das jedä Tag zum Zmorge, eifacht göttlichstens!!
Am Abig simmer denn wie jedä Tag nochli in Pool gange und denn natürlich no in Whirlpool wo zu oisem Resort göhrt ;)
Am Ziestig Morge ischs denn früeh uf gange und Denise, Andy und ich sind go surfe! Mir hend sonen Surf-Lehrer gha ;) und es hett unglaublich Spass gmacht!! Luegeds oi selber ah...
Am Abig simmer denn ane Cocktail Dinner Cruise, nur das mir nur erlaubt gsi sind zum die Alkoholfreie Cocktails trinke. Und dete hemmer denn d'Wal ziemlich näch bim Schiff gseh. Eimal sogar 4 zämä! und sie hend so usem wasser gwunke und so, mega süess!
Am Mittwuch hemmer chli en relaxende Tag gha, wie eich jedä Tag :D Mer sind go shoppe und vill go sünnele. Han mir so viell cooli Summersache kauft und natürlich au no Souvenirs. Und ich bin (nachem Sunnebrand) au no chli bruun worde :)
Am Dunnstig simmer denn go Schnorchle gange. Mer sind miteme Boot usegfahre zu dere meeega chline Insle Molokini. Und det hetts tuuusigi vo Fisch, Schildchrote, de Riif und es isch eifacht bezaubernd! Isch aso eindüütig eine vode schönste Moment i mim Lebe gsi, wo ich's erste mal abtaucht! Mer chans igendwie gar nid recht beschriebe. Mer muesses eifacht selber Live erläbe!!
Am Fritig simmer denn mitem Auto nach Lahaina gfahre, dete finded eich s'Meiste statt. Mir hend eich de ganzi Tag gshopped und ich han viiiilll z'vill Geld usgeh..:D Naja es hett sich uf jedä Fall glohnt!!
Am Abig simmer denn asone Show wo "Ulalena" heisst gange. Det gahts um die Native Hawaiian People und wie die gläbt hend und ihri Kultur bevor d'Europärer cho sind. Isch meeega Idrücklich gsi. Mit de Liechter, Musig, Tänz und eifacht allem. Lohnt sich echt zums go luege, falls igendöbert vor hett bald mal nach Hawaii z'gah ;)
Am Samstig hemmer denn umbedingt nomal wellä go surfe, wells so viell Spass gmacht hett und das hemmer denn au gmacht. Und es hett no sones "Whale-Festival" gha mit leckerem Esse und sonen Market und so...
Am Sunntig isch denn leider scho die ganzi Wuche verbii gsi und es isch eifacht alles viell z'schnell gange... :( Aber ich muess echt sägä, es isch en Höhepunkt vo mim Ustuschjahr gsi und wirds sicher nie vergässe!! Drum han ich mal no wellä sägä, DANKE vill mal Mami dass du mir das alles ermöglichsch <3
Überigens "Humuhumunukunukuapua'a isch de Name vom typische Hawaiianische Fisch ;) Falls igendwer no wett meh Fötelis gseh, ich hans ufem Facebook. Es gaht ebä so ewigs lang zum die uf de Blog z'lade. Weiss aber nid obs funktioniert zums aluege, wemmer kei Facebook hett. Aber en Versuech ischs wert:
http://www.facebook.com/album.php?id=1634550098&aid=89345
So das wer s'Endi vo mim endlos lange Blog und merci für die wo bis da ane glässe hend :D
Nur na 4 Mönet und denn bin ich scho weider dihei!!!
WHERE DID TIME GO?!?!
http://www.facebook.com/album.php?id=1634550098&aid=89345
So das wer s'Endi vo mim endlos lange Blog und merci für die wo bis da ane glässe hend :D
Nur na 4 Mönet und denn bin ich scho weider dihei!!!
WHERE DID TIME GO?!?!
